32 жастағы әйел такси иесіне залалды толық өтеп беріпті
Шымкенттің қылмыстық істер жөніндегі ауданаралық соты такси жүргізушісі мен мұғалімнің арасындағы дауды қарап, істі тоқтатты, деп хабарлайды Azattyq Rýhy.
Айта кетейік, жаздың басында әлеуметтік желіде таксидің терезесін күл талқан еткен әйелдің видеосы тараған болатын. Сот істі қарай келе, бірқатар детальдарды жариялады. Күдікті әйелге қылмыстық кодекстің 202-бабы 1-бөлігі бойынша, яғни, біреудің мүлкіне айтарлықтай залал келтіріп, бөтеннің мүлкiн қасақана жойды деген айып талыған.
«Сотталаушы әйел 2025 жылдың маусым айында таңғы сағ.05:30 шамасында «Яндекс-GO» такси қызметін шақырып, такси жүргізушісімен араларында түсінбеушілік орын алып, жанжалдасқан, содан кейін сотталушы әйел сыраның бөтелкесімен «Geely Emgrand» маркалы көліктің алдыңғы панелін және мониторын ұрып сындырып, сосын автокөліктен түсіп, сол жақ алдыңғы есіктегі терезені бөтелкесімен ұрып, жолдың жиегінде жатқан тасты қолына алып алдыңғы және артқы терезелерін, сол жақ есігінің ішкі пластикалық бөлшегін сындырып, жәбірленушіге айтарлықтай залал келтіріп, бөтеннің мүлкiн қасақана бүлдiрген», - деп хабарлайды сот.
Жергілікті «Отырар» телеарнасы таратқан мәліметке сүйенсек, даудың басы сотталушы әйелдің құрбысынан басталған көрінеді.
«Екі әйел мас күйде такси шақырып, өзі алдыңғы орынға, құрбысы артқы орынға отырған. Сол кезде сотталушы әйелдің құрбысы көліктің ішіне құсып қойған. Екеуі такси жүргізушісіне химиялық тазалаудың құнын да төлеп береміз деп діттеген жеріне жеткен. Ақшалары жетпеген соң кепіл ретінде ұялы телефонын тастап кеткен. Бірақ, қайтып келіп, шу шығарып, көліктің күл-талқанын шығарған», - деп хабарлайды телеарна.
Сот тараптарды тыңдаған және такси жүргізушісі сотталып отырған әйел бүкіл залалды өтеп бергенін айтып, оған қатысты шағымын қайтарып аламын деген. Екі тараптың татуласқанын ескерген сот мұғалімді жазадан босатты.