Өрт ошағы анықталды, таралу қаупі жоқ
Алматыда Назарбаев даңғылының бойында орналасқан көпқабатты үйдің бірінен өрт шықты. Қалалық ТЖД ақпаратынша, оқиға орнына алғашқыда 20 адам мен 5 техника жіберілген. Одан бөлек газ-түтіннен қорғау қызметінің де мамандары барған.
«3 маусым күні сағат 11:05-те Алматы қаласы ТЖД Өрт сөндіру бөліміне Алмалы ауданы, Назарбаев көшесіндегі 43/1 үйден өрт шыққаны туралы хабарлама келіп түсті. Сағат 11:11-де (6 минут) оқиға орнына өрт сөндірушілер жетті. Өрт 5 қабатты тұрғын үйге жапсарласа салынған екі қабатты ғимараттың жертөлесінде орналасқан дәмханадан шыққаны белгілі болды. Ғимаратта адамдардың бар-жоғына барлау жүргізіліп жатыр. Аталмыш кафе тағам жеткізу түрінде жұмыс істейді. Нысан электр қуатынан ажыратылады. Өрт ошағы анықталды, таралу қаупі жоқ», - деп хабарлады қалалық ТЖД баспасөз қызметінің жетекшісі Гүлдана Нұрымбетова.