Ербаян Мұхтардың ісі бойынша күдіктілер әлі анықталмаған

Бас әскери прокурордың бірінші орынбасары Мақсат Қазиев орталық коммуникациялар қызметінде өткен брифингте сарбаз Ербаян Мұхтардың ісіне қатысты мәлімет айтты, деп хабарлайды Azattyq Rýhy.

«Қазіргі таңда сарбаз Ербаян Мұхтардың ауыр жарақат алуына қатысты жедел тергеу операциялары жүріп жатыр. Сараптамалар тағайындалған. Олардың нәтижесі бойынша шешім қабылданады. Тергеу жалғасып жатыр. Бүгінде іс бойынша күдіктілер анықталған жоқ», - деді ол.

Қазиев Ұлттық ұлан сарбаздың ата-анасымен үнемі байланыста екенін айтты.

Ұлттық ұлан өкілдері сарбаз дәретханада құлап, жарақат алғанын мәлімдеген еді. Алайда оның ата-анасы бұл нұсқаға сенбейді. Ербаян Мұхтар 2023 жылдың желтоқсанында ауруханаға түскен, оған 5 рет ота жасалды.