Шымкент тұрғындары VIP нөмірлер алуға 1 млрд теңге жұмсаған

Шымкенттіктер 1 миллиард теңгеге автомобильдеріне VIP нөмірлер сатып алған. 2023 жылы шаһар тұрғындарына 4 мың қымбат нөмір сатылған, деп хабарлайды Azattyq Rýhy Otyrar-ға сілтеме жасай отырып.

VIP нөмірлердің құны 200 мың теңгеден басталып 1 миллион теңгеден асып кетеді.

Шымкент қаласының мамандандырылған ХҚКО өкілі Нұрхан Байсейітовтің сөзінше VIP нөмірлердің бағасы қымбаттағанына қарамастан, сұраныс жоғары.

«VIP нөмірлердің бағасы базалық есептік көрсеткіштің өсуіне қарай өсе бере береді. Қазір бір АЕК 3932 теңге, бірақ соған қарамастан сұраныс өте жоғары», - дейді ол.

Шымкент тұрғындары аймақ коды – 17 санына басымдық береді екен. 707, 077 және 777 сандары бар нөмірлер көш басында тұр. Танымал нөмірлердің арасында 010-нан 090-ға дейінгі комбинациялар бар.