Қазіргі кезде 5 аудандағы өрт ошағы өшкен жоқ
Төрт күннен бері отқа оранып жатқан Лос-Анджелесте кем дегенде 10 адам қаза тапты. Синоптиктер жел тағы да күшейіп, өртті өршіте түседі деген болжам жасап отыр, деп хабарлайды Azattyq Rýhy ВВС-ге сілтеме жасап.
Орман өрті АҚШ-тың ең қымбат ғимараттары орналасқан ауданды шарпыған. Жергілікті биліктің хабарлауынша, Палисейдте 5300 нысан жойылып, Итонда 4000 мен 5000 аралығындағы нысанға залал келді немесе түгелдей жанып кетті.
Кейбір тұрғындар түгі қалмай өртеніп кеткен баспаналарына келіп, көріп, суретке түсірген. Қиын жағдайды пайдаланып, ұрлық-қарлық жасаған 20 адам қолға түсті. Лос-Анджелестің басшысы Карен Басс тонаушылық жасағандарға еш кешірім жоғын айтты.
АҚШ президенті Джо Байден үкіметтің өрттен зардап шеккендерді алты ай ішінде толық көмекпен қамтамасыз ететінін айтты.