Бұл факт полицияда тіркелді
Сарыарқа көшесіндегі жаңа саябақта бүлдіршін ашық құдыққа құлап кетті. Баланы құдықтан әкесі алып шықты. Полиция құдықтың балансына жауапты ұйымды іздестіріп жатыр, деп хабарлайды Azattyq Rýhy ekaraganda.kz сайтына сілтеме жасап.
Баланы құтқарған әкесі оқиға орнында түсірілген бейнежазбаны әлеуметтік желіде таратты. Ол баласын қалай құтқарғанын айтып берді:
«Міне, біздің жаңа саябақ. Осы жерге құлап кетті. Артынан түскен менің іздерім осында. Осылай баламды шығарып алдым. Мұнда серуендеп жүрген едік, ол осында ойнап жүріп құлап кетті», – деді баланың әкесі.
Бұл факт полицияда тіркелді.
«Жәбірленушінің медициналық мекемеге жүгінгенін ескере отырып, түпкілікті шешім сот-медициналық сараптама қорытындысы шыққаннан кейін қабылданады. Сондай-ақ полицейлер осы жерасты коммуникациясына жауапты ұйымды анықтап, жауапкершілікке тарту жұмыстарын жүргізіп жатқанын хабарлаймыз», – деп түсініктеме берді Қарағанды облыстық полиция департаментінің баспасөз қызметі.