«Тау суы толастамай тұр»: Нөсер жауын Шымкент пен іргелес ауыл тұрғындарын әуреге салды

Су деңгейі 20-50 см жеткен

Кеше кешке толассыз жауған нөсер жаңбырдан соң Шымкент қаласы Еңбекші ауданындағы Елтай елдімекеніне іргелес жатқан Төлеби ауданынан секундына 3-5 текше метр су ағып келген.

«Су деңгейі 20-50 см. Көп мөлшерде келген судан арық арнасынан асып, салдарынан тұрғын үйлердің аулаларын су басқан. 14.05.2020 жылы сағат 12-00-дегі жағдай бойынша аталған елдімекекенде жауын-шашын салдарынан 60 аула учаскесі мен 60 шаруашылық құрылыстарын (су деңгейі 20-50 см) су басты, оның ішінде 24 тұрғын үйді су басты, 5 шаруашылық нысан қирады», - деп хабарлады қалалық әкімдік.

Ауылдан 300 адам, оның ішінде 124 бала эвакуацияланыпты. Су мотормен сорылып жатыр. Қала әкімі Мұрат Әйтенов ауылға барып, жауан-шашыннан келетін қауіпті алдын-ала болжай алмаған лауазымды тұлғаларға тиісті шара қолданылатынын айтты.

Баспасөз қызметі тау суы әлі толасатамай, ауыл ортасынан ағып жатқанын жеткізді.

Сонымен бірге жаңбыр әсерінен Шымкент қаласының ішіндегі бірқатар көшелерді су басып қалған. Әлеуметтік желілерде Қайтпас, Нұрсәт, Самал шағынаудандарының тұрғындары түсірген видеолар тарады.

«Нұрсәт. Машиналар өшіп қалған. Судың ағысын қараңыздар», - деп пікір білдірген видеолардың бірінің авторы.

Нұрсәт шағынауданындағы Нұрсәт-3 тұрғын алабы нөмірі 111, 97 көпқабатты тұрғын үйлердің төбесінен су ағып, подъездерді шайған. Үйлердің жертөлелері суға толған.

Қалалық баспасөз қызметі бүгін көшедегі судың арықтарға ағып кеткенін айтады.