Қостанай облысында мас жүргізуші полициядан қашып, жолда апатты жағдай жасады (ВИДЕО)
Алайда ұсталған кезде құқықбұзушы өз көлігі мен полицияның қызметтік көлігін зақымдаған
Сарыкөлде 36 жастағы жергілікті тұрғын, жүргізуші куәлігінен айырылғанына қарамастан, патрульдік полицияның тоқтау туралы талабын елемей, көлікпен қаша жөнелген, деп хабарлайды Azattyq Rýhy облыстық полция департаментіне сілтеме жасап.
Алдыңғы дөңгелегі жарылып қалғанына қарамастан, жүргізуші жол қозғалысының басқа қатысушыларына қауіп төндіре отырып, жүруін жалғастырған. Полиция қызметкерлері бұл өрескел құқықбұзушылықты дер кезінде тоқтатып, жол көлік оқиғасының алдын алды. Алайда, ұсталған кезде құқықбұзушы өз көлігі мен полицияның қызметтік көлігін зақымдаған.
Құжаттарды тексеру кезінде жүргізушіден алкогольдің өткір иісі шыққаны анықталған. Жүргізуші куәлігінен айырылғанына қарамастан, мас күйде көлік жүргізгені үшін оған қарсы қылмыстық іс қозғалды. Ол 6 жылға дейін бас бостандығынан айырылып, өмір бойы жүргізуші куәлігінен айрылуы мүмкін.
«Сонымен қатар полицияның заңды талабына бағынбағаны үшін сот оны 15 тәулікке қамауға алу туралы шешім шығарды. Ер адам арнайы УҰИ қамалып, көлігі айып тұрағына қойылды», - делінген хабарламада.
