Ақтауда ауа райының қолайсыздығына байланысты қоқыс полигонындағы өртті сөндіру қиынға соғып жатыр

Шенеуніктердің айтуынша, ауа райының қолайсыздығына байланысты биогаз түзіліп, өрт қайтадан тұтанып жатыр, деп хабарлайды Azattyq Rýhy  Lada.kz-ке сілтеме жасап.

Мұнайлы ауданы әкімшілігінің мәліметінше, полигон алты учаскеге бөлінген. Өрт №2 учаскеде басталып, көрші учаскелерге тараған. Қазіргі уақытта жанған аумақтарды құммен жабу үшін үш тиегіш, үш самосвал, бір бульдозер, аудандық төтенше жағдайлар бөліміне тиесілі екі арнайы өрт сөндіру машинасы және 12 өрт сөндіруші жұмылдырылған.

№1 және №2 учаскелер құммен жабылған, ал №3 учаскеге қоқыс төгу жұмыстары жүргізілуде.

Желдің күшеюіне байланысты көмілген қалдықтардың беті ашылып, әртүрлі газды қосылыстар реакцияға түсуде. Нәтижесінде биогаз – жанғыш газ бөлініп, қайтадан жану жағдайы туындауда. Айта кетейік, биогаздың құрамында 55-65% метан және 35-45% көмірқышқыл газы бар.

Еске салсақ, тұрғындар ауадағы күйіктің өткір иісіне жаппай шағымдануда. ТЖД мәліметінше, Мұнайлы ауданындағы қоқыс полигонында 800 шаршы метр аумақта қоқыс өртеніп жатыр.

Бұған дейін осы қоқыс полигонында 17 тамызда өрт тіркелген болатын. Ол кезде 400 шаршы метр аумақ отқа оранған.

Қыркүйек айының басында осы нысанда тағы да осындай өрт болған еді.