Қос азаматтық: Байқоңыр қаласының 18 жастағы тұрғыны ұсталды

Қызылорда облысында қос азаматтықпен өмір сүріп жатқан азаматша жауапкершілікке тартылды, деп хабарлайды Azattyq Rýhy.

«Шілде айында ҚР ІІМ Байқоңыр қаласындағы өкілдігінің көші-қон қызметінің қызметкерлері құжаттарды тексеру кезінде белгіленген мерзімде Ресей Федерациясының азаматтығын алғаны туралы хабарламаған Байқоңыр қаласының тұрғыны, 18 жастағы азаматшаны анықтады. Шетелдіктен Қазақстан Республикасы азаматының жеке куәлігі алынды. Қазақстан Республикасының азаматтығынан айырылу тіркелді», - деп хабарлады полиция.

Тәртіп бұзушыға айыппұл салынды. ҚР ӘҚБК-нің 496-бабы 2-бөлігіне сәйкес, оның көлемі – 200 АЕК (738 400 теңге).

Қазақстан Республикасының Конституциясына сәйкес елде қос азаматтыққа жол берілмейді.

«Қазақстан Республикасының азаматтығы туралы» ҚР Заңының 21-бабына сәйкес басқа мемлекеттің азаматтығын алған жағдайда, көші-қон қызметі бөлімшелерін алған күннен бастап күнтізбелік 30 күн ішінде хабардар ету қажет», - деп еске салды ІІМ.