Алматыда 10 мыңнан астам мопед пен самокат жүргізушісі жауапқа тартылды
Мопедтердің қатысуымен 321 жол-көлік оқиғасы тіркелген
Алматыда 10 мыңнан астам мопед пен самокат жүргізушісі жауапқа тартылды, деп хабарлайды Azattyq Rýhy.
«Жолаушыларды тасымалдау ережелерінің талаптарын, жол қиылыстарынан өту ережелерін, қорғаныс құралдарын міндетті түрде пайдалану талаптарын және т.б. жол қозғалысы ережелерін бұзғаны үшін 4800 мопед және 5200 самокат жүргізушісі әкімшілік жауапкершілікке тартылды. Кәмелетке толмағандардың екі доңғалақты көлікті пайдалануына ерекше назар аударылады. 100-ге жуық ата-ана балаларына самокат пен мопед жүргізуге рұқсат бергені үшін жауапкершілікке тартылды, бұл жалпы заң мен қауіпсіздік нормаларына қайшы келеді», - деп хабарлады Алматы ПД.
Жыл басынан бері самокаттың қатысуымен 38 жол-көлік оқиғасы тіркеліп, 42 адам зардап шекті, абырой болғанда, қаза болғандар жоқ. Ал мопедтердің қатысуымен 321 жол-көлік оқиғасы тіркеліп, соның салдарынан 3 адам қаза тауып, 324-і жарақат алған.
