«Ауыл - Ел бесігі»: Ақсу әкімдігі 500 млн теңгені заңсыз аударған

Павлодар облысында «Ауыл - Ел бесігі» мемлекеттік бағдарламасын іске асыру кезінде заң бұзушылықтар анықталды. Салынып жатқан объектілер үшін шамамен 500 млн теңге негізсіз аударылған, деп хабарлайды Azattyq Rýhy.

«Атап айтқанда, тапсырыс беруші 5 дене шынықтыру-сауықтыру кешенін салуды жүзеге асыратын мердігерлерге орындалмаған жұмыс түрлері үшін алдын ала төлем жасаған. Бұл ретте, құрылыс-монтаждау жұмыстары пайдалануға беру кестесінен 5 айға кейін қалып жүргізілуде. Қадағалау актісі бойынша Ақсу қаласының әкімдігі артық төленген бюджет қаражатын қайтару бойынша наразылық талап қою жұмыстарын жүргізді, бүгінгі күнге мемлекетке 60 млн теңге қайтарылды», - делінген хабарламада.

Заң бұзу әрекеті үшін Ақсу қаласы әкімінің орынбасары тәртіптік жазаға тартылды.

Ал құрылыс бөлімінің басшысы Әдеп жөніндегі кеңеспен мемлекеттік қызметке кір келтіретін тәртіптік теріс қылық жасағаны үшін жұмыстан шығарылды.