Алматы қаласының бас дәрігері офисін үйге айналдырған
Ол соңғы бір аптадан бері офисте қонып жүр, деп хабарлайды Azattyq Rýhy тілшісі.
Басқарма басшысы қауіпті індет жұқтырған науқастармен байланыста болғандықтан, үйіне бармай жүргенін айтады.
«Менің оқшаулануыма қатысты айтсам, мен 6 күн бұрын Орталық қалалық клиникалық ауруханасына барғандықтан, жұқтыру ықтималдығы жоғары адаммын, сондықтан әріптестерім қауіп-қатерге ұшырамас үшін өз-өзімді оқшаулап отырмын. Офисте қонып жүрмін», - деді Алматы қаласы Қоғамдық денсаулық басқармасының басшысы Тілеухан Әбілдаев.
Басқарма басшысы коронавируспен ауырған науқастың қасында болған. Соvid-19 вирусына қарсы үш рет анализ тапсырып, барлығында теріс нәтиже алыпты.
«Мен ауруханада науқасқа бардым. Менің қасымда бөлім меңгерушісі, қарапайым дәрігер және емхананың бас дәрігері болды. Мен өз әріптестеріммен бірге карантинге алынған сәттен бастап үш рет талдаулар өткіздім – барлығының нәтижесі теріс. Енді 14 күн бойы өзімді оқшаулаймын», - деді ол.
Сондай-ақ, ол шу шыққан Орталық қалалық клиникалық ауруханасына жаңадан келген бас дәрігерді де мақтады. Айтуынша, медициналық ұйым басшысының міндетін бүгіннен бастап атқаруға кіріскен Марат Абдуллаевтың осы салада 40 жылдық тәжірибесі бар.
«Орталық қалалық клиникалық ауруханасы басшысының міндеттерін бүгінгі күні Марат Шадыбайұлы Абдуллаев атқаруда. Оның денсаулық сақтау жүйесіндегі жалпы еңбек өтілі 40 жылды құрайды. 28 жылдан астам басшылық лауазымдарда жұмыс істеді, үлкен ұйымдастырушылық қабілеті бар, сондай-ақ 2012 жылдан бастап 2017 жылға дейін осы стационардың басшысы болды», - деді Т. Әбілдаев.
Әмірболат Құсайынұлы, Алматы