Музыканттарды құтқарушылар екі тәулік іздеген
Әнші Димаш Құдайбергеннің анасы Светлана Айтбаева жоғалған музыканттарды тапқан құтқарушыларға алғыс айтты, деп хабарлайды Azattyq Ruhy.
Оның айтуынша, үш жігіт аязды күні ауылға шығып кеткенмен, жолда қалып қойған.
«Қаңтардың 10 -ы күні таңертең Атыраудан ауылда тұратын ата - анасына кеткен Ринатты таба алмай қалдық . Мына аязда машинамен шығып кеткен 3 жігіттің далада қалғаны анық болды. Үйіне де жетпеген, телефондары өшкен...Ринат - жақсы музыкант, аранжировщик, қасындағы жігіттер де өнерлі жандар, той- жиынның сәні болып жүрген жастар. Сонымен дабыл қағылып, іздестіру -құтқару жұмыстары басталып кетті», - деп жазды ол.
Әншінің сөзінше, көп жағдайда жылы үйде отырған адамдар далада қалғандар мен оларды құтқару жолында еңбек етіп жүрген, тілсіз жаудан арашалап қалған мамандардың ауыр жұмысын бағаламайды.
«Екі тәулікке жуық күн -түн демей еңбек еткен Атырау облыстық төтенше жағдайлар департаменті қызметкерлерінің арқасында жігіттеріміз таңғы 4:20 кезінде Қызылқоға ауданының «Ораз мола» орнынан (Атырау облысы Мақат ауданының Доссор кентінен 120 км қашықтықта) аман – есен табылды», - деді әнші.
Жоғалған жігіттерді құтқару жұмыстары жаяу, автокөлікпен және ТЖМ авиациясымен аэровизуалды іздеу тәсілдерімен жүргізілген. Адамдарды іздестіру-құтқару жұмыстары түнде де тоқтамаған. Полиция қызметкерлері, еріктілер және туыстарынан құралған 45 адам, 11 техника жұмылдырылған. Ол құтқарушылардың атын тізіп, барлығына алғысын жеткізді.
«Атырау облысы ТЖД Өрт сөндіру және авариялық-құтқару қызметінің №3 өрт сөндіру бөлімінің қарауыл бастығы, азаматтық қорғау аға лейтенанты Клауов Ернұр Болатұлына, аға өрт сөндіруші, азаматтық қорғау сержанты Ерқанат Базарбайұлына ,№2 мамандырылған өрт сөндіру бөлімінің бастығы, азаматтық қорғау майоры Мұқанғалиев Мейрамбек Сайлауұлына, №10 өрт сөндіру бөлімінің бастығының міндетін уақытша атқарушы, азаматтық қорғау аға лейтенанты Хуресов Райымбек Эдуардұлына, өрт сөндірушілер, кіші сержанттар Қанат Наурызбек Қанатұлына, Әбілмажан Батырлан Нұржанұлына рахмет айтамыз», - деді ол.