Дезинфекция жасалған тұрғын үй дәліздері мен аулаларға 5 сағат бойы шығуға болмайды

Қалалық тұрғын үй саясаты басқармасы күн сайын екі рет мегаполистегі жолдарды жуады. Бұл жұмыстарға 90 көлік, тротуар жинайтын 54 машина мен 962 жұмысшы қатысады. Қосымша 112 адам қоқыс жәшіктерін, орындықтар мен аялдамаларды дезинфекциялаумен айналысады, деп хабарлайды қала әкімдігінің баспасөз қызметі.

«Бүгін, 25 наурызда сағат 9.00-ден бастап 32 бригада көппәтерлі тұрғын үйлердің кіреберістерін залалсыздандыруды бастады. 8633 кіреберіс (2868 үй) пен 1441 ауланы өңдеу жоспарлануда. Тазалау жұмыстары жүргізілмес бұрын дауыс зорайтқыш жабдығы бар көліктер арқылы ескертулер хабарланады. Сондай-ақ келесі өңдеу жұмыстарының кестесі кіреберістерге ілінеді», - делінген хабарламада.

Бұдан өзге 25 наурызда Есентай, Үлкен Алматы және Теренкур өзендерінің жағалауын дезинфекциялау жоспарланып отыр.

«Сонымен қатар, қаланының тазарту жұмыстарына Алматы гарнизонының күштері тартылды. Олар бірінші кезекте жалпы көлемі 60 га болатын қаланың жеті ірі базарларын дезинфекциялады. Бұл жұмысқа 317 сарбаз жұмылдырылды. Оған қоса 11 бірлік арнайы техника мен өңдеу жұмысына киілетін 151 киім жиынтығы берілді. 49 тонна арнайы су ерітіндісі жұмсалды», - делінген хабарламада.

Сонымен қатар, гарнизон қызметкерлері карантиндік бақылауда тұрған 13 медициналық ұйымға санитарлық өңдеу жүргізбек. Бұл жұмысқа 320 әскери қызметші қатысады.