Қазіргі кезде оқиғаның жай-жапсары анықталып жатыр
Батыс Қазақстан облысында тағы бір жас жігіт суға кетті. Бұл туралы БҚО ТЖ департаментінің баспасөз қызметінен мәлім етті, деп хабарлайды Azattyq Rýhy.
Департамент мәліметінше, оқиға 8 шілде күні Бәйтерек ауданы Жайық ауылында болды.
«Сағат 19.50-де «Орыс моншалары» кешені ауданында құтқарушылар «Карьер» жасанды су қоймасынан 28 жастағы тұрғынның денесін алып шықты. Алдын ала мәлімет бойынша марқұм мас күйінде шомылуға тыйым салынған жерден түсіп, сағат 18.45-те батып кеткен. Қазіргі кезде оқиғаның жай-жапсары анықталып жатыр. Сот-медициналық сараптама тағайындалды. БҚО ТЖ департаменті тұрғындарға судағы қауіпсіздік ережелерін қатаң сақтау керектігін еске салады», - делінген хабарламада.
Бұл – соңғы күндері Бәйтерек ауданында болған екінші оқиға. Осыған дейін 5 шілде күні Асан ауылында 21 жастағы жігіт «тілсіз жаудың» құрбаны болды.