Алматы облысында браконьерлер инспектор мен қорықшыны суға батырмақ болған

Браконьерлер Балқаш-Алакөл облысаралық бассейндік балық шаруашылығы инспекциясының мемлекеттік инспекторын мен қорықшыны суға батырып кетпек болған, деп хабарлайды Azattyq Ruhy.

Экология және табиғи ресурстар министрлігінің баспасөз қызметі хабарлағандай, 4 сәуірде Балқаш-Алакөл облысаралық балық шаруашылығы бассейндік инспекциясының Төменгі Іле балық инспекциясының мемлекеттік инспекторы «Майтан» ЖШС қорықшысымен Іле өзенінде бірлескен рейдтік іс-шаралар жүргізу кезінде тыйым салынған құралдарды (электр тогын) қолдана отырып заңсыз балық аулау дерегін анықтаған.

«Үш моторлы қайықта 6 заң бұзушы браконьерлікпен айналысқан. Браконьерлерді ұстамақ болған кезде олар табиғат пайдаланушының жүзу көлігін суға батыруға әрекет жасап, артынша оқиға орнынан қашып кеткен», - делінген хабарламада.

Бұл жағдайда ҚР Қылмыстық кодексінің 380-1-бабында көзделген құқықбұзушылықтың құрамы, яғни мемлекеттік инспектор мен қорықшының қызметтік міндеттерін орындау кезінде олардың өміріне қолсұғушылық дерегі тіркелген.

Осы бапқа сәйкес жануарлар дүниесін қорғау жөніндегі мемлекеттік инспектор мен қорықшыға қатысты олардың қызметтік міндеттерін орындау кезінде қасақана іс-әрекеттері үшін кінәлілердің мүлкі тәркілене отырып 10 жылдан 15 жылға дейінгі мерзімге бас бостандығынан айыруға жазаланады. Сонымен қатар балық ресурстарын және басқа да су жануарларын заңсыз өндіргені үшін ҚР ҚК-нің 335-бабымен 3 жылға дейінгі мерзімге бас бостандығынан айыру түріндегі қылмыстық жауапкершілік белгіленді.

«Осыған байланысты Алматы облысы Балқаш ауданының полиция бөліміне 2023 жылғы 6 сәуірде ұстау кезінде қарсылық көрсету, қызметтік міндеттерін атқару кезінде лауазымды адамдарға шабуыл жасау және заңсыз балық аулау фактілері бойынша іс жүргізу шешімін қабылдау үшін өтініш берілді», - делінген хабарламада.

Бұл мәселе ҚР ЭТРМ Балық шаруашылығы комитетінің бақылауына алынды.