Алматыда балаларды тамақтан тарықтырған балабақша басшысы қызметінен босатылды

Алматыда бүлдіршіндерді тамақтан тарықтырып, ас-ауқаттан қысты деген мемлекеттік балабақшаның басшысы қызметінен босатылды, деп хабарлайды Azattyq Ruhy агенттігі «31-арнаға» сілтеме жасап.

Сондай-ақ мекеменің мейірбикесі мен әдіскері де комиссия қорытындысымен жұмыстан шығарылды. Олар жіберілген кемшіліктерді дер кезінде бақылауға алмастан, міндетіне мін келтіргені үшін жазаланды. Бұдан бөлек, топ тәрбиешісі, мекеме қоймашысы мен аспазшы да тәртіптік жауапкершілікке тартылып отыр.

Еске сала кетейік, өткен айда Алматыдағы балабақшалардың бірінде «тәрбиешілер бүлдіршіндердің асын аузынан жырып, үнемдеп келеді» деп ата-аналар шағымданған болатын. Тіпті балаларының қара шайға нан жібітіп, жеп отырғанын видеоға түсіріп жариялаған еді.

«Мемлекеттік бөбекжайда бүлдіршіндерге құнарсыз ас беру барып тұрған бассыздық» деп мәселе көтерген ата-аналардың бұл мәселесіне құзырлылар араласты.

Осылайша, білім басқармасынан арнайы комиссия құрылып, жан-жақты тексеру жүргізілген. Алайда 20 наурызда тексеруді аяқтаймыз деген мониторингтік топ араға 2 апта салып, нәтижесін күні кеше ғана жариялады.