Алматы облысында жергілікті тұрғындар қытайлық жұмысшыларды соққыға жыққан

Алматы-Өскемен тас жолының құрылысымен айналысып жатқан қытайлық «Citic Construction» компаниясының жұмысшыларын жергілікті тұрғындар соққыға жыққан деп хабарлайды Azattyq Rýhy тілшісі Алматы облыстық Полиция департаментінің баспасөз қызметіне сілтеме жасап.

Есте болса, күні кеше аталған компанияда төбелес болғаны туралы мәлімдеген болатынбыз. Қытайлық үш жұмысшы ұлты қазақ жүк көлігінің жүргізушісін жабылып ұрған. Полицияның мәліметінше, жәбірленген жігіт те Қытай азаматы екен. Олар артынша әкімшілік жауапкершілікке тартылған.

Осы оқиғадан кейін жергілікті тұрғындар жиналып, компанияның аумағында жүрген қытайлық жұмысшыларды соққыға жығыпты. Салдарынан 4 адам ауруханаға жеткізілген. Полиция қылмыстық іс қозғап, сотқа дейінгі тергеу амалдарын жүргізуде.

Сондай-ақ, «Citic Construction» компаниясына жүргізілген тексеру барысында шетелдік 33 жұмысшының Қазақстанда заңсыз жүргені анықталды. Олар да әкімшілік жауапкершілікке тартылған. Қазір аталған азаматтарды елдеріне қайтару жұмыстары жүргізіліп жатыр.