Алматы облысында қытай жұмысшылары қазақ азаматын соққыға жыққан

Алматы облысы Ескелді би ауданындағы «Citic Construction» компаниясындағы шетел және жергілікті жұмысшылар арасында жанжал туындап, соңы төбелеске ұласты деп хабарлайды Azattyq Rýhy тілшісі.

Белгілі болғандай, Қанат Жамбыл есімді КамАЗ жүк көлігінің жүргізушісін қытайлық үш жұмысшы жабылып ұрып, денесіне жарақат салған.

Осы оқиғадан кейін компания аумағына облыс әкімінің орынбасары келіп, вахталық бригаданың жетекшісі Ван Панмен бірге жұмысшылармен кездесу өткізген. Жиын барысында қазақстандық жұмысшылар билік өкілдеріне шағымдарын жеткізді. Олардың айтуынша, қытайлық компания басшылары жұмыс уақытын тым ұзаққа созады екен. Сондай-ақ, тамақтың сапасыздығы, жалақының шетелдіктердікінен әлдеқайда аз екені және жатақхананың санитарлық талаптарға сай келмейтіні айтылды. Тіпті, түнгі ауысымда істейтін қазақстандық жұмысшыларға мүлдем ыстық тамақ берілмейтін көрінеді.

Облыс әкімдігінің баспасөз қызметінің мәліметінше, қытайлық компанияда 138 адам жұмыс істеуі тиіс. Олардың 94 ҚР азаматы болса, қалған 44-і Қытайдан келген. Алайда, жүргізілген рейд барысында компанияда 66 ҚХР азаматының жұмыс істеп жүргені анықталған. Қазір олардың Қазақстан аумағына қандай мақсатпен келгені анықталып жатыр.

Жергілікті әкімдік пен компания басшылары қазіргі таңда ҚХР азаматы Ван Панды жұмыстан босату мәселесін қарастырып жатыр. Сонымен қатар, шетелдік және жергілікті жұмысшыларға тең еңбек жағдайын жасау мәселесі де көтерілді.

Бүгін аталған компанияға ҚР Премьер-министрі Асқар Мамин мен Алматы облысының әкімі Амандық Баталов келеді деп күтілуде.

Әмірболат Құсайынұлы, Алматы облысы