Қарағандыда автобус жүргізушісі мен кондукторы көшеде дәрет сындырған

№53 бағыттағы автобустың соңғы аялдамасында қоғамдық көлік жүргізушісі мен кондукторы жұрттың көзінше дәрет сындырған. Бұл туралы ekaraganda порталы жазды.

Жергілікті тұрғындар мұндай жайттың жиі болатынын айтып, жергілікті әкімдікке шағымданған. Әкімдік өкілдері болса дәл сол аялдаманың жанында дүкен бар екенін, дүкенде ақылы дәретхана жұмыс істейтінін айтады. Алайда, жүргізушілер мен кондукторлар онда бармай, ісін жол бойында тындыруды жөн санайды екен.

Тұрғындар тарапынан шағым көбейгендіктен әкімдік 2023 жылдан бастап аялдамалардың жанына қоғамдық дәретханалар салуды жоспарлап отыр. Ал, жұрт көзінше дәрет сындырған автобус жүргізушілерінің ісін автопарк басшылары қарайды.