Кісі өлтіру оқиғасының мән-жайы тергеу барысында анықталатын болады
Алматыда өртенген үйден ер адамның мәйіті табылды, деп хабарлайды Azattyq Rýhy ІІМ баспасөз қызметіне сілтеме жасап.
Остроумова көшесіндегі үйлердің бірінде өрт шықты. Өрт туралы хабарлама “101” пультіне кешкі сағат 21:00 шамасында келіп түскен.
«Өртті ауыздықтаған соң бөлмелердің бірінен зорлық-зомбылық белгілері бар ер адамның мәйіті табылды. Оның үй иесі, 38 жастағы К. есімді азамат екені анықталды. Бұрын жүк көлігінің жүргізушісі болып жұмыс істеген. Бірақ денсаулығына байланысты бірнеше айдан бері еш жерде жұмыс істемеген. Сот-медициналық сараптамасының қорытындысына сәйкес, адам өліміне – мойынның кесілген жарақаты, сол жақтағы кеуде тұсындағы пышақ жарақаты, іштің және сол жақ бұғана аймағындағы еніп кеткен пышақ жарақаттары және одан кейінгі мәйітті өртеу себеп болған. Тергеу барысында 44 жастағы П. есімді азамат анықталды, ол қылмыс жасалар алдында жәбірленушінің үйіне қонаққа келген», – деді Түрксіб аудандық ПБ жанындағы полиция бөлімінің бастығы Мейірхан Жаңабаев.
Ер адамдардың алкогольдік ішімдік ішкені анықталды. Олардың арасында жанжал туындап, оның барысында П. есімді азамат үй иесіне бірнеше рет пышақ жарақатын салған.
«Қылмыстың ізін жасыру үшін күдікті үйге өрт қойған. Аталған дерек бойынша ҚР ҚК-нің 99-бабы 1-бөлігіне сәйкес қылмыстық іс қозғалды. Жауап алу кезінде ұсталған адам ас үй пышағын бірінші болып үй иесінің ұстағанын, ол оның қолынан жұлып алып, оған бірнеше рет ауыр соққылар жасағанын айтты. Кісі өлтірудің нақты мән-жайы тергеу барысында анықталатын болады», – деді М. Жаңабаев.