Петропавлда 17 жастағы қызды зорлаған қылмыстық топ сотталды

Солтүстік Қазақстан облысының қылмыстық істер жөніндегі мамандандырылған ауданаралық сотында 17 жастағы қызды зорлаған қылмыстық топқа қатысты сот үкімі шықты. Қылмыскерлер 10 жылдан 16 жылға дейін бас бостандығынан айрылды, деп хабарлайды Azattyq Rýhy тілшісі

Зорлау фактісі өткен жылдың маусым айында Петропавл қаласының маңындағы «Березовая роща» демалыс орнында тіркелді. Сотталушылар 17-21 жас аралығындағы жігіттер. Олар «зорлау» және «жыныстық зорлық-зомбылық» қылмыстық баптары бойынша жауапкершілікке тартылды. Сот төрт адамға ең жоғары қауіпсіздік мекемесінде 10 жылдан 16 жылға дейін бас бостандығынан айыру жазасын тағайындады. Олардың барлығы өмір бойы педагогикалық лауазымдарды және кәмелетке толмағандармен жұмыс істеуге байланысты лауазымдарды атқару құқығынан айырылды. 

17 жастағы сотталушы кәмелетке толмағандарды ұстауға арналған орташа қауіпсіздік колониясында өмірінің 10 жылын өткізбек. Ол да педагогикалық лауазымдарды және кәмелетке толмағандармен жұмыс істеуге байланысты лауазымдарды екі жыл мерзімге атқару құқығынан айырылды. 

Сот жапа шегушінің арызын толықтай қанағаттандырды. Бойжеткенге 10 млн теңге көлемінде моральдық зиян төленеді. Қаржы сотталушылардан ортақ тәртіппен алынады. Бес сотталушыға қатысты үкім әзірге заңды күшіне енген жоқ.

Сот шешімен келіспеген жағдайда олар 30 күн ішінде жоғары тұрған органға қайта арыз бере алады. Жапа шегушінің туған-туыстары судья әділ шешім шығарды деп есептейтінін жеткізді. Жан түршігерлік оқиғадан кейін кәмелетке толмаған қызға медициналық және психологиялық жәрдем көрсетілді. Сотта оның қатты психологиялық соққы алғаны айтылды.

Эльмира Мәмбетқызы