«Мазда» автокөлігінің жүргізушісі автокөлікке арқанмен байланған тюбингпен адамды сүйреген
Павлодарда экстремалды ойынды ұнататын жүргізуші жазаланды, деп хабарлайды Рavlodarnews.kz.
Облыстық полиция департаменті баспасөз қызметінің мәліметінше, бірнеше күн бұрын тұрғындар Усолка шағын ауданындағы жағалауымен серуендеу кезінде қауіпті қысқы ойындардың куәсі болған. Қауіптің жағдайға бей-жай қарай алмаған адамдар полицияға қоңырау шалған
"Мұндай экстремалды ойын-сауық өмірге қауіп төндіреді. Тюбингтке тұрған адам өз қозғалысының траекториясын басқара алмай қалуы және оның жолында кез келген кедергі болуы мүмкін. Тіпті, ол автомобильді күрт тежеу кезінде көліктің астына түсіп кетуі де мүмкін. Салдарынан жарақат алуы немесе ажал құшу қаупі жоғары", - деді Павлодар қаласы ПБ патрульдік полиция батальонының командирі Ренат Шарипов.
Сонымен қатар, полиция қызметкері жақында сол жерде көлік мұздың астына түсіп кеткенін еске салды.
Жолаушыларды тасымалдау ережелерін сақтамағаны үшін жүргізушіге қатысты ҚР ӘҚБтК-нің 593-бабы 1-бөлігі бойынша әкімшілік хаттама толтырылып, профилактикалық әңгіме жүргізілді.