Өрт кәсіпорынның 2800 шаршы метр аумағына тараған еді
Атырау облысындағы Теңіз мұнай-газ кен орны аумағындағы өрт сөндірілді, деп хабарлайды Azattyq Rýhy.
Атырау облысы Төтенше жағдайлар департаменті баспасөз қызметінің хабарлауынша, «Теңізшевройл» ЖШС мердігер кәсіпорындарының бірінің аумағынан шыққан алапат өрт сөндірілді.
«Өрттен құрбандар мен зардап шеккендер болған жоқ. Өрттің шығу себебі анықталуда. Өртті сөндіруге ТШО Өрт сөндіру және авариялық-құтқару жұмыстары қызметінің 17 қызметкері мен 4 техникасы, «COCR» ЖШС-нің 6 қызметкері мен 2 техникасы, Атырау облысы Төтенше жағдайлар департаментінің 12 қызметкері мен 2 техникасы шықты», - делінген ТЖД хабарламасында.
Еске салсақ, 1 наурыз күні кешке Nasar Solution мердігер компаниясының өндірістік цехында өрт шыққан болатын. Кәсіпорынның ашық алаңындағы өндірістік тұнба өртеніп, өрт 2800 шаршы метрге дейін тараған еді.