Алматыдағы екі автобустың соқтығысуынан зардап шеккендердің жағдайы белгілі болды

Алматының Медеу ауданында Тәтібеков пен Серпер көшелерінің қиылысында екі автобус соқтығысып, бес адам қалалық ауруханаға жеткізілді, деп хабарлайды Sputnik.kz.

Апат куәгерлері мен №4 автобус жүргізушісінің айтуынша, №4 автобус аялдамада тұрған. Сол уақытта №203 автобус жылдамдықпен жүрген. Серпер көшесінен өткен соң жүргізуші аялдамада тұрған автобусты айналып өтпек болған, алайда сол жақтан көлік қозғалған. №203 бағдар жүргізушісі автокөлікпен соқтығыспау үшін рөлді оңға бұрған, артынша №4 автобусты соқты.

Алдын ала мәлімет бойынша, екі автобуста 20-ға жуық адам зардап шекті деп хабарланған. Бірақ жедел жәрдем келгеннен кейін бес адамға көмек қажет екенін анықтаған.

"Алматы қаласының №4 қалалық клиникалық ауруханасына жедел жәрдем бригадасы үш адамды жеткізді. Келген бойда пациенттерді травматолог және нейрохирург дәрігерлердің мультидисциплинарлық бригадасы қарап шықты. Оларға клиникалық-зертханалық зерттеулер қызметі көрсетілді. Науқастар ауруханаға жатқызудан бас тартып, амбулаториялық емделуге жіберілді", - деп хабарлады қалалық денсаулық сақтау басқармасының баспасөз қызметі.

Тағы екі адам №5 ауруханада тереңдетілген медициналық тексеруден өтті. Зерттеу нәтижелері мен қажетті көмек алғаннан кейін оларды емдеуді үйде жалғастыруға жіберді.

№4 маршруттың жүргізушісі қақтығыс болған кезде өзінің №203 автобусқа қарай жүгіріп барғанын айтты. Ол жерде автобус есігі ашылмай қалған.

Жүргізушілер әйнекті сындырып, іштен бірнеше адамды шығарды. Артынан артқы есікті ашып, зардап шеккендерге автобустан шығуға көмектесті.

Жол-көлік оқиғасының мән-жайын полиция анықтап жатыр.