Қостанай облысында қасқыр ауыл тұрғынына шабуыл жасады

Қостанай облысында қасқыр адамға шабуыл жасады, деп хабарлайды alau.kz.

Оқиға Наурызым ауданы аумағында, аудан орталығынан 40 шақырым жерде орын алған.

Қарамайшы ауылының 54 жастағы тұрғыны дәрігерлерге таңертең үйден шыққан кезде өзіне қасқырдың шабуыл жасағанын айтқан.

Көмек сұрап айғайға басқан жәбірленушінің дауысын естіп жүгіріп келген көршісі жануарды балтамен ұрып өлтірген.

Қасқырдың тісі батқан ер адамның екі қолы дәрімен өңделіп, қажетті екпелер жасалды және медициналық бақылауға алынды.

Өлі қасқыр облыс орталығына сараптамаға жіберілді.