ШҚО-да қызметкерін зорлады деген күдікпен УҰИ бастығы қамауға алынды

Шығыс Қазақстан облысында қарамағындағы қызметкерін зорлады деген күдікпен уақытша ұстау изоляторының (УҰИ) бастығы Руслан Аксартов жұмыстан босатылды, сол сияқты Риддер қалалық полиция бөлімінің басшысы қызметінен шығарылды, деп хабарлайды Azattyq Rýhy.

«Құқық қорғау органдарының беделін түсіретін теріс қылық жасағаны үшін ол жұмыстан шығарылды, ал оның тікелей басшылары, тіпті қалалық полиция бөлімінің бастығын лауазымынан босату туралы шешім қабылданды», - деп хабарлады ШҚО полиция департаментінің бастығы Сағат Мәдиев.

Облыстық полиция басшысы күдіктінің УҰИ-ға қамалғанын айтты.

«Бүгінде жеке құрам арасындағы заңдылық пен қызметтік тәртіп мәселелеріне Ішкі істер органдары басымдық береді. Біз өз қатарымыздан тәртіпсіз қызметкерлерді тазарту бойынша белсенді жұмыс жүргізіп жатырмыз. Біздің қағидатымыз бойынша кез келген заңбұзушылықтың жолы кесіледі, кінәлі адамдарға жұмыстан босатуға дейін ең қатаң тәртіптік шаралар қолданылады», - деді Мәдиев.