Қазір өрттің шығу себебі нақтылануда
Орал қаласында тоғыз қабатты тұрғын үйде өрт болды. Бұл туралы Батыс Қазақстан облысы Төтенше жағдайлар департаментінің баспасөз қызметі хабарлады.
Ресми хабарламаға сүйенсек, оқиға 5 қараша күні сағат 21.21-де Захаров көшесі 79-мекенжайында тіркелген.
«Аталмыш үйдің екінші қабатындағы пәтерде жеке заттар жанып кеткен. Аумағы 20 шаршы метрді қамтыған өрт сағат 21.42-де оқшауланып, 21.54-те сөндірілді. ТЖ департаментінің күшімен жүрегі ұстап қалған ер адам эвакуацияланып, жедел жәрдемге тапсырылды. 35 адам далаға өздері шыққан, олардың бесеуі – балалар. Аталмыш үйдің 15 тұрғыны үшін арнайы автокөлікте жылыту пункті ұйымдастырылды» – делінген хабарламада.
Қазіргі кезде өрттің шығу себебі, келтірілген шығын, кінәлі адамдар анықталу үстінде.