Аталған оқиғаға қатысты сотқа дейінгі тергеу жұмысы басталды
Бірінші дәрежелі күйік шалған ауыл тұрғыны Павлодар қаласының ауруханасына жатқызылды, деп хабарлайды Pavlodarnews.kz.
«Павлодар ауданының полициясына ауылдардың бірінде ер адам әйелін өртеп жібергені туралы қоңырау түсті. Оқиға орнына келген полиция қызметкерлері 8 тамыз күні сағат 02.00 шамасында ерлі-зайыптылар арасында ауызша жанжал болғанын анықтады. Күйеуі мас күйінде өз көлігімен кетуге тырысқан, ал әйелі оған тыйым салған. Жанжал кезінде күйеуі тоңазытқыштан алкоголь алып, жұбайына құйып, оттықпен өртеп жіберген. Сол күні ерлі-зайыптылар қайын атасының мерейтойында болған», - деді Павлодар облысы Полиция департаменті бастығының бірінші орынбасары Жасқайрат Қайыров.
Ер адам есін жиған кезде бірден өртті сөндіре бастап, киімдерін шешіп, жедел жәрдем шақырған.
Аталған фактіге қатысты полиция Қазақстан Республикасы ҚК 107-бабы бойынша сотқа дейінгі тергеуді бастады.