ШұғылҚазақстанда COVID-19 вирусын жұқтырғандар саны 870 мыңнан асты

Шымкентте 200 адам жиналған той тоқтатылды

Қызметкерлер мен даяшылар нысан ішінде маска тақпай қызмет көрсеткен

Шымкенттік полицейлер карантин шектеулеріне бағынбаған тойхананы анықтады. Шымкент ҚПД Әл-Фараби ауданы Полиция басқармасының қызметкерлері карантин талаптарының сақталуын бақылау мақсатында күнделікті рейдтік іс-шара жүргізуде, деп хабарлайды Azattyq Rýhy «Отырар» телеарнасына сілтеме жасап.

2021 жылдың 25 шілдесінде сағат 14:04-те Шымкент қаласында орналасқан «Ғажайып» тойханасы карантиндік шектеулерді бұзып, келушілерді қабылдап жатқанын анықтады. Қызметкерлер мен даяшылар нысан ішінде маска тақпай қызмет көрсеткен.

Сондай-ақ, 200 адамға арналған «Үйлену» тойын өткізіп жатқаны белгілі болды.
Аталған жайт бойынша, карантин талаптарын сақтамай жұмысын жалғастырған тойхана әкімшісінен түсініктеме алынды.

Жинақталған іс-құжаттар шара қолдану үшін ҚР ӘҚБтК-нің 425-бабы (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша Тауарлар мен көрсетілетін қызметтердің сапасы мен қауіпсіздігін бақылау басқармасына жолданды.

Осы орайда, Шымкент қаласы Полиция департаментінің қызметкерлері бекітілген қаулыға бағынбай, әлі күнге той-жиын өткізіп жатқан тұрғындарға бұл өздерінің ғана емес, өзгелердің де өміріне қауіп төндіріп жатқанын қатаң ескертеді.