Өзен маңындағы елдімекендерді су басу қаупі төніп тұрған жоқ
Батыс Қазақстан облысында өзен суының деңгейі көтеріліп, жолды шайып кетті. Бұл туралы БҚО Төтенше жағдайлар департаментінің баспасөз қызметі хабарлады.
Оқиға 8 ақпан күні кешкі сағат 19:00 шамасында Бәйтерек ауданы Рубежин ауылының шетінде болған.
«Аөпанның 3-і мен 6-сына дейін жаңбыр мен қар үздіксіз жауғандықтан, Рубежка өзенінің деңгейі көтерілді. Соның салдарынан уақытша айналма автожолды (ені 6 метр, ұзындығы 30 метр) су шайып кетті. Негізгі көпір өткен жылдың қыркүйек айынан бері күрделі жөнделіп жатқандықтан (қосалқы мердігер – «Ануш» ЖШС), айналма жол салынған болатын. Дегенмен автокөлік қозғалысына шектеу қойылған жоқ», - делінген ТЖД хабарламасында.
Қазіргі уақытта өзен арнасы қалпына түсуде, өзен маңындағы елдімекендерді су басу қаупі төніп тұрған жоқ. Оқиға орнына департамент басшылығы барды.