Алмас Камалұлы 63 жасында ұзаққа созылған аурудан көз жұмды
Қазақстандық белгілі хирург Алмас Ормантаев дүниеден озды. Бұл туралы дәрігердің әріптестері хабарлады.
«Бүгін, 63 жасында, ұзаққа созылған аурудан С.Д. Асфендияров атындағы Қазақ Ұлттық Медицина Университетінің балалар хирургия кафедрасының меңгерушісі, медицина ғылымының докторы, профессор Ормантаев Алмас Камалұлы дүниеден өтті! Марқұмның отбасына көңіл білдіреміз», - деп жазды хирург Асылжан Ерекешов Facebook желісіндегі парақшасында.
Алмас Ормантаев – академик, Қазақстанда балалар хирургиясының негізін қалаған Камал Ормантаевтың ізбасары.
Алмас Камалұлы Қазақ ұлттық медициналық университетінің балалар хирургиясы бөлімінің меңгерушісі, «Қазақстандық балалар хирургтері» республикалық қоғамдық бірлестігінің төрағасы болды, медицина ғылымдарының докторы, профессор атағын алған.
Алмас Ормантаев Ұлттық ана мен бала ғылыми орталығында педиатрия және балалар хирургиясы бойынша медициналық директордың орынбасары болып жұмыс істеді, сонымен қатар балалар хирургиясы бөлімінің бастығы болды.