Полицейлер қарияны көрші ауданмен шектес аумақтан тапқан
Талдықорған қаласында адасып кеткен 83 жастағы әжей табылды. Бұл туралы облыстық Полиция департаментінің баспасөз қызметі хабарлады.
17 қараша күні сағат 14:00 шамасында Талдықорған қаласы Полиция басқармасының кезекші бөліміне қаланың 5-шағынауданында тұратын 83 жастағы әжейдің таңертең үйінен шығып, қайта оралмағанына алаңдаған туыстары хабарласқан.
Жоғалған кейуананың киген киімі мен түр-түсі туралы хабарламаны Талдықорған қаласы ПБ патрульдік полиция ротасының қызмет көрсетуден оралған № 162 борты қабылдады.
«Тәртіп сақшылары дереу жақын маңда орналасқан тұрғын үй кешендерінің аулалары мен көшелерді аралауға кіріскен. Үш сағат ішінде полицейлер көрші ауданмен шектес аумақтан адасып кеткен қарияны тапты. Олар әжейді үйіне жеткізді», - делінген ПД хабарламасында.