Жедел-іздестіру шаралары барысында 25 жастағы ер адам ұсталды
Көкшетау қаласындағы супермаркеттен «Jack Daniels» маркалы америкалық вискидің 6 бөтелкесін ұрлаған азамат ұсталды, деп хабарлайды Ақмола облыстық Полиция департаментінің баспасөз қызметі.
28 қазан күні Көкшетау қаласының полиция басқармасының кезекші бөліміне күзет фирмасының бастығынан шағым түсті. Онда 12 қыркүйек күні сағат 20.06-да белгісіз тұлға «SMALL» супермаркетінен «Jack Daniels» вискиінің төрт бөтелкесін ұрлап кеткені айтылған.
«Көкшетаулық тұрғын бұл ұрлығын азсынып, келесі күні тағы да сол брендтің екі бөтелкесін ұрлап кеткен. Дүкен иесіне келген залалдың жалпы сомасы 80 мың теңгеден асқан», - делінген хабарламада.
Жедел-іздестіру шаралары барысында тәртіп сақшылары 25 жастағы ер адамды анықтады. Өз кінәсін мойындаған күдіктіге қатысты қазіргі уақытта тергеу амалдары жүріп жатыр.