Қазіргі уақытта аталған факті бойынша сотқа дейінгі тергеу жүргізілуде
Солтүстік Қазақстан облысының екі ауданында сібір еліктерін заңсыз аулаудың екі фактісі анықталды. Өңірде жыл басынан бері 17 заңсыз аңшылыққа қатысты қылмыстық іс қозғалды, деп хабарлайды Azattyq Rýhy тілшісі СҚО Полиция басқармасының баспасөз қызметіне сілтеме жасап.
Мамлют ауданы полиция бөліміне Новое ауылының маңында елікті заңсыз аулау фактісін анықтағандары туралы хабарлама келіп түскен. Оқиға орнына учаскелік полиция инспекторы, аудандық полиция бөлімінің басшылығы, сондай-ақ СҚО Полиция департаменті табиғатты қорғау полициясы қызметкерлері барды. Нәтижесінде аңшылық шаруашылықтың қызметкерлері және полицейлер Audi 100 автокөлігін тоқтатқан, көлікте Мамлют ауданының үш тұрғыны болған. Audi салонында тіркелмеген екі ұңғылы 12 калибрлі ИЖ-58 аңшы мылтығы және қоңыр түсті іздермен төсеніш анықталды. Бірнеше метр жерден атылған сібір елігі табылды. Қазіргі уақытта аталған факті бойынша ҚР ҚК 337-бабы 1-бөлігі «Заңсыз аңшылық» бойынша сотқа дейінгі тергеу жүргізілуде. Заңсыз аңшылық жасауда күдіктілер келу туралы міндеттемемен босатылды. Бірнеше сараптама тағайындалды, нәтижелері бойынша түпкілікті процессуалдық шешім қабылданды.
Сібір елігін заңсыз аулаудың тағы бір фактісі Шал ақын ауданында анықталды. Жануарлар әлемінің аумақтық инспекциясы қызметкерлерінен Алқаағаш ауылынан шамамен 8 км жерде сібір елігінің атылғаны туралы хабарлама келіп түскен. Оқиға орнына полиция қызметкерлері барған. Нәтижесінде Алқаағаш ауылының үш тұрғыны ұсталды. Оқиға орнынан еліктің еті, 12 калибрлі екі гильза, сондай-ақ ВАЗ 2106 автокөлігі алынды. Алынған елік еті сараптамаға жіберілді. Аталған факті ҚР ҚК 337-бабы 1-бөлігі «Заңсыз аңшылық» бойынша Сотқа дейінгі тергеп-тексерудің бірыңғай тізіліміне енгізілді. Ұсталғандарға қатысты келу туралы міндеттеме бұлтартпау шарасы тағайындалды, тергеу жүргізілуде.
Күзгі аңшылық маусымының басталуына байланысты экологиялық қылмыстар мен құқық бұзушылықтардың алдын алу және анықтау бойынша рейдтер жандандырылды.
Эльмира Мәмбетқызы, СҚО