Түркістан облысында төбелескен әйелдер әкімшілік жауапкершілікке тартылды

Түркістан облысының полицейлері әлеуметтік желіге мониторинг жүргізу кезінде бірнеше әйелдің төбелескені түсірілген бейнежазбаны анықтады, деп хабарлайды Polisia.kz.

29 тамыз күні сағат 15:43 шамасында Арыс АПБ-нің «102» пультіне жергілікті тұрғыннан үйінде айқай-шу болып жатқаны жөнінде арыз келіп түскен. Жәбірленуші әйелдің айтуынша, ажырасқан келіні туыстарымен келіп, оны ұрып-соғып, дене жарақатын салған. Содан аталмыш дауды бейнежазбаға түсіріп, мессенджер арқылы таратып, абыройларына нұқсан келтіргенін хабарлаған.

Аталған ақпарат бойынша полицейлер тез арада әрекет етіп, тексеру жүргізген. Нәтижесінде, арызданушы мен қызы үйінің алдында тұрғанда ажырасқан келіні киімдерін алып кетуге келгені, соңында сөзге келіспей дау шығып, жаға ұстасып, бір-бірінің киімдерін жыртып, дене жарақаттарын салғандары анықталды.

Аталған жайтқа байланысты ҚР ӘҚБтК-нің 434 бабы (Ұсақ бұзақылық) бойынша әкімшілік хаттама толтырылып, сараптама тағайындалған.