Алматыдан Қостанайға бағыт алған ұшақ бортында жолаушы қайтыс болды

Жолаушы созылмалы аурудан көз жұмған болуы мүмкін

Көрнекі фото: sputniknews.kz

Алматы – Қостанай бағытында ұшқан әуе рейсінде 70 жастағы ер адам көз жұмды. Бұл туралы ҚР Ішкі істер министрлігінің Көліктегі полиция департаментінің баспасөз қызметі хабарлайды.

«9 қыркүйекте кешкі сағат 17:34-те Қостанай стансасының желілік полиция бөлімшесіне Алматы – Қостанай әуе рейсінің 70 жастағы жолаушысы қайтыс болғаны туралы хабарлама түсті. Алдын ала болжам бойынша жолаушы созылмалы аурудан көз жұмған», - деді ҚР ІІМ Көліктегі полиция департаментінің өкілі Ләззат Қасымжанова.

Департамент өкілінің хабарлауынша, қазір оқиға бойынша тергеу жұмыстары басталды. ҚР Қылмыстық-процестік кодексінің 201-бабына сәйкес басқа мағлұматтар тергеу мақсатында жария етілмейді.