Алматыда кәмелеттік жасқа толмаған балалар сабақ үстінде порнографиялық видео көрген
Ыңғайсыз оқиға 7 қыркүйек күні №55 мектепте болған. ZOOМ платформасы арқылы өткен сабақ үстінде порнографиялық видеолар көрсеткендерге қатысты Алматы әкімдігі түсінік берді, деп хабарлайды Azattyq Rýhy тілшісі.
Алматы қаласы әкімдігі баспасөз қызметінің мәліметінше, мектеп директоры С.Айдарованың атына математика мұғалімі А.К. Тасылбаевадан хат келген. Мұғалім ZOOM платформасында онлайн сабақ өткізіп жатқанда белгісіз біреулер тосыннан қосылып, оқушыларға «ұятсыз» фотосуреттер мен видеолар көрсеткен. Мектеп директоры аталған жағдай туралы полицияға бірден хабарлапты.
«Белгісіз біреулер А. К Тасылбаеваның ZOOM интернет-платформасында өтіп жатқан сабағына қосылып, балағат сөздер айтып, кәмелетке толмағандарға порнографиялық суреттер мен бейнеролик көрсеткен. Мектеп директоры С. Айдарова дереу педагогикалық құраммен профилактикалық түсіндіру жұмыстарын жүргізіп, Алмалы ауданының полиция басқармасына өтініш берді. Өтініш сотқа дейінгі тергеудің бірыңғай тізілімінде 2020 жылғы 7 қыркүйектегі No207511035003305 нөмірімен тіркелді. Қазіргі уақытта мектеп әкімшілігі білім беру платформасына рұқсат етілмеген адамдардың кіруін шектейтін қауіпсіз платформаға ауыстыруды қарастыруда», - деп мәлімдеді әкімдіктің баспасөз қызметі.
Әмірболат Құсайынұлы, Алматы