Балалар үйінің мұғалімі тәрбиеленушілердің қаржысын ысырап етті деген күдікпен ұсталды

Полиция қызметкерлері тәрбиеленушілердің қаржысын ысырап қылды деген күдікпен Алматы облыстық балалар үйінің әлеуметтік педагогын ұстады. Бұл туралы Polisia.kz хабарлайды.

Арнайы құрылған жедел-тергеу тобы 30 жастағы М. есімді азаматшаны Тараз қаласында қолға түсірген. Ұсталған облыстық балалар үйінің қызметкері Алматы қаласына жеткізілді.

Аталмыш жағдай ҚР Қылмыстық кодексінің 189-бабы (сеніп тапсырылған бөтен мүлікті иеленіп алу немесе ысырап ету) бойынша сотқа дейінгі тергеудің бірыңғай тізілімінде тіркеліп, күдіктінің ісін қарау Алматы қаласы бойынша Экономикалық тергеу департаментіне берілді.