Олар тергеу изоляторына қамалған
Өткен аптада Астанада қолға түскен «Самұрық-Қазына» төрағасы Нұрлан Жақыпов пен «Қазақстан темір жолы» компаниясының басшысы Елжас Отыншиев тергеу изоляторына қамалған, деп хабарлайды Azattyq Rýhy.
Бұл ақпаратты редакцияға Ұлттық қауіпсіздік қызметі растады.
«12 қараша күні бұл адамдар сыбайлас жемқорлық жасады деген күдікпен уақытша ұстау изоляторына қамалды. 14 қараша күні тергеу соты оларды қамауға алуға санкция берді», - деп мәлімдеді ҰҚК.
Естеріңізге сала кетейік, 12 қараша күні Ұлттық қауіпсіздік комитеті Астанада «Самұрық-Қазына» мен «Қазақстан темір жолы» басшыларын қолға түсірген болатын. Сол күні әлеуметтік желіде Астанадағы тұрғын үйлердің жанында дорба-дорба доллардың шашылып жатқаны туралы видео таралған еді. Алғашқы дереккөз бұл ақшаны кабинетке Ұлттық қауіпсіздік комитеті кіріп келгенде, Жақыпов пен Отыншиев кеңсенің терезесінен лақтырып жіберді деген ақпарат тараған. Ұлттық қауіпсіздік комитеті олардың ұсталғанын растады.
«2026 жылдың 11 қарашасында Ұлттық қауіпсіздік комитетінің Сыбайлас жемқорлыққа қарсы күрес қызметі «Самұрық-Қазына» АҚ Басқарма төрағасы Нұрлан Жақыпов пен «Қазақстан Темір Жолы» ҰК» АҚ-ның басқарма төрағасы Елжас Отыншиевті ұстады. Олар сыбайлас жемқорлық жасады деген күдікпен ұсталды», - деп хабарлайды Ұлттық қауіпсіздік комитетінің баспасөз қызметі.
Кейін бұл іске президент Қасым-Жомарт Тоқаевтың өзі назар аударып, шұғыл кеңес өткізген еді. «Самұрық Қазына» ұлттық әл-ауқат қоры мен «Қазақстан темір жолы» ҰК» АҚ басшыларының ұсталуына байланысты мәлімдемесінде президент жемқорларды «біздің қас жауымыз» деп бағалаған болатын.
Бірнеше күннен кейін президенттің кеңесшісі әрі баспасөз хатшысы Айбек Смадияров бұл тергеу туралы президент «әуел бастан білгенін» мәлімдеді және Ұлттық қауіпсіздік кеңесінің бұрынғы төрағасы Ермек Сағымбаевтың отставкасына қатысты пікір танытты. Ал жерде шашылып жатқан доллардың видеосы таралып кеткені үшін Ішкі істер министрі Ержан Сәденовтің қызметтік ескерту алғанын мәлімдеді.