Жол апатынан үш адам зардап шеккен
Оралда ВАЗ автокөлігі жолаушылар автобусымен соқтығысты. Жол-көлік апатынан жеңіл көліктегі жолаушы көз жұмды, деп хабарлайды Azattyq Rýhy тілшісі ПД баспасөз қызметіне сілтеме жасап.
Жол-көлік оқиғасы жол торабында болған. Апат болған күні облыс орталығында жаңбыр жауып тұрғандықтан жан-жақты көру мүмкін болмаған.
«Оралда Исатай-Махамбет көшелерінің қиылысында және Пугачев көшесінде № 2 жолаушылар автобусы ВАЗ 21102 автокөлігімен соқтығысты. Жеңіл көлік солға бұрылған кезде бағдаршамға қарамай, автобусқа жол бермей өтіп кеткен. Салдарынан жол апатынан үш адам зардап шеккен. Олар облыстық көпсалалы ауруханаға жеткізілді. Жеңіл көліктің бір жолаушысы жансақтау бөлімінде қайтыс болды», - делінген хабарламада.
Полиция өкілдері жол апатына қатысты сотқа дейінгі тергеу жұмыстары басталғанын, қажет сараптама тағайындалғанын хабарлады.