Алматыдан 257 шақырым жерде жер сілкінді

24 тамыз күні кешке Қазақстанда жер сілкінісі тіркелді. ҚР ТЖМ «Ұлттық ғылыми сейсмологиялық зерттеулер институты» ЖШС сейсмикалық станциялар желісі Астана уақытымен сағат 19:31-де жер сілкінісін тіркеді, деп хабарлайды Azattyq Rýhy.

Бұл туралы 24 тамызда ҚР ТЖМ баспасөз қызметі хабарлады. Жер сілкінісінің эпицентрі Қазақстан аумағында, Алматыдан оңтүстік-шығысқа қарай 257 шақырым жерде орналасқан.

Мамандардың мәліметінше, эпицентрдің координаттары – солтүстік ендіктің 49,117° және шығыс бойлықтың 84,500° градусы.

Эпицентр мегаполистен қашық орналасқанына қарамастан, жер дүмпулері елдің шығысындағы елді мекендерде сезілген. Атап айтқанда, Шығыс Қазақстан облысының Үлкен Нарын ауылында жер сілкінісінің есептік қарқындылығы 2 балды құрады. Зардап шеккендер немесе қираған нысандар туралы ақпарат түскен жоқ.

Құтқарушылар жер сілкінісі кезінде есте ұстайтын 10 қарапайым әрекетті алдын ала ойластырып қоюға кеңес береді:

• Сабыр сақтаңыз, дүрбелеңге бой алдырмаңыз;
• Жер дүмпуі кезінде лифт пен баспалдақты пайдаланбаңыз;
• Жиһаздан, терезеден және аспалы шамдардан алыс тұрыңыз;
• Сенімді әрі берік паналайтын орын табыңыз. Жоғарғы қабаттарда болсаңыз, ғимараттың негізгі көтергіш қабырғаларының бұрышына орналасуға тырысыңыз;
• Ғимараттан шығыңыз. Көпқабатты үйлерде жер дүмпуі тоқтағаннан кейін ғана сыртқа шығыңыз;
• Су, газ және электр қуатын өшіріңіз;
• Алдын ала дайындалған төтенше жағдай сөмкесін өзіңізбен бірге алыңыз;
• Электр желілерінен, ғимараттар мен ағаштардан алыс тұрыңыз;
• Қайталама жер дүмпулеріне дайын болыңыз;
• Қарт адамдарға және мүмкіндігі шектеулі жандарға көмектесіңіз.