Шахтинскіде екі зейнеткер құдыққа түсіп кетті

Шахтинск қаласында құдыққа құлап кеткен екі ер адамды құтқарушылар алып шықты, деп хабарлайды Azattyq Rýhy.

Төтенше жағдайлар министрлігінің мәліметінше, оқиға Парковая көшесінде орналасқан дүкендердің бірінің аумағында болған. 1957 және 1960 жылы туған екі азамат аумақты тазалап жүріп абайсызда терең құдыққа түсіп кеткен.

«Оқиға орнына жедел жеткен ТЖМ құтқарушылары арнайы құралдардың көмегімен зардап шеккендерді «септиктен» шығарып алды. Олар бірден жедел медициналық жәрдем бригадасына тапсырылды», – делінген ресми хабарламада.

Жедел жәрдем қызметкерлері зардап шеккен азаматтарды Шахтинск қаласының орталық ауруханасына жеткізді. Қазіргі уақытта олар дәрігерлердің бақылауында.