Қазақстан азаматы АҚШ-та терроризмге қатысы бар деген күдікпен ұсталды

АҚШ-тың Иммиграциялық және кедендік бақылау қызметі (ICE) 5 маусымда жүргізген операция кезінде Қазақстан азаматы Еламан Балтагерейді тұтқындады, деп хабарлайды Azattyq Rýhy ресми дереккөзге сілтеме жасап.

Өткен жазда иммиграциялық сот оны елден шығару туралы шешім қабылдаған, бірақ ол сот отырысына келмеген.

«Еламан Балтагерей терроризммен байланысы бар деген күдікке ілінген тұлға ретінде ұсталды. Оған осыған дейін елден шығару туралы түпкілікті сот шешімі шыққан болатын. Ол елден депортациялау бойынша мәселелері шешілгенге дейін ICE қамауында болады», - делінген хабарламада.

Редакция осы мәселеге қатысты Қазақстанның Сыртқы істер министрлігіне сұрақ жолдады.