Өрт жаңа жыл түні тіркелді
Тараз қаласында жаңа жыл түні мейрамхананың жазғы алаңында ірі өрт шықты. Оқиға екі қабатты ғимаратқа жапсарлас салынған жазғы тамақтану орнында болған. Бұл туралы ТЖМ-нің Telegram-арнасы жазды, деп хабарлайды Azattyq Rýhy.
Жамбыл облыстық Төтенше жағдайлар департаментінің мәліметінше, өрт шыққан сәтте мейрамхана ішінде адамдар болған. Құтқарушылардың жедел әрекетінің арқасында ғимараттан шамамен 100 адам қауіпсіз жерге эвакуацияланды.
Өрттің негізгі ғимаратқа таралуына жол берілген жоқ.
Құтқару жұмыстары барысында өрттің мейрамхананың негізгі ғимаратына және жақын орналасқан жанармай құю бекетіне таралу қаупі болған. Алайда өрт сөндірушілер жағдайды толық бақылауға алып, қауіптің алдын алды.
Ресми ақпаратқа сәйкес, өрт 300 шаршы метр аумақта сөндірілді.
Зардап шеккендер жоқ.
Қазіргі таңда өрттің шығу себебі анықталып жатыр.