Түркістан облысында өкпе қабынуынан 42 адам қайтыс болды
Аймақта бүгінгі күні 2 мыңға жуық адам пневмониямен ауырып жатыр
Түркістан облысында өкпе қабынуынан 42 адам көз жұмды. Қауіпсіздік пен сақтық шараларын қатаңдатпаса, өңірдегі ахуал ушығып кетуі мүмкін. Себебі пневмониямен ауырғандар мен қайтыс болғандар саны азаймай отыр, дейді түркістандық жастар мен қоғам белсенділер. Бұл туралы «Хабар24» телеарнасы хабарлады.
Аймақта бүгінгі күні 2 мыңға жуық адам пневмониямен ауырып жатыр. Олардың 1 677-нің жағдайы орта деңгейде. Ал 42 науқас көз жұмған.
«Себебі қазір біз бен сіз адам көп шоғырланатын ортадан табыла берсек, маскалық режимді сақтамасақ, арнайы құралдарды пайдаланбасақ, бұл ауруды одан әрі күшеюіне, таралуына, оның зияндылық деңгейінің көбеюіне жағдай жасаймыз. Мемлекет басшысының карантин режимін қатаңдату бойынша шешімінің дұрыс екенін Түркістан жастары қолдаймыз. Карантин режимінің күшейтілуі, оны әрбір адамның сақтауы – біздің ертеңге күнгі жарқын болашағымыздың кепілі», деді Облыстық «Жас Отан» ЖҚ төрағасы Жансерік Жұман.
