Тоғжанов пен Маржықпаев өңірлердің қысқа дайындығын тексерді

Үкімет мүшелері энергетикалық инфрақұрылымы әбден тозған және апат қаупі жоғары облыстарды аралап жүр, деп хабарлайды Azattyq Rýhy.

Үкіметтік топтағы өңірлік инспекторлар әрі премьердің кеңесшілері Ермек Маржықпаев пен Ералы Тоғжанов Абай және Маңғыстау облыстарындағы дайындық барысын тексерген.

«Семейге барған Ермек Маржықпаев қалалық жылу көздерін, оның ішінде «Ғаббасова», «Орталық», АҚ-3 қазандықтарын, сондай-ақ ЖЭО-1, АҚ-1 және 103-103А қазандықтарын тексерді. Қаланың инфрақұрылымы жылу беру маусымына 86%-ға дайын. Жалпы, Семейде 12 нысан әлі жөнделіп жатыр», - деп хабарлайды үкімет.

Ал, Маңғыстау облысына барған Ералы Тоғжанов «МАЭК» энергия кешенін жаңғыртуға қатысты жүйелі мәселелерге назар аударды. Айта кету керек, бұған дейін Үкімет резервінен «МАЭК» реконструкциясына қаражат бөлінген.

«Бұдан бөлек, Ақтаудағы жылу желілерін жаңарту жобалары да ерекше назарда. Қалада кезең-кезеңімен 44 шақырым магистралды және 10 шақырымнан астам шағын аудандардағы ішкі құбырлар ауыстырылып жатыр. Қазіргі таңда желілердің орташа тозу деңгейі 79%, ал жобаны іске асырғаннан кейін бұл көрсеткіш 75%-ға дейін төмендейді. Тұрғын үй қоры мен әлеуметтік нысандар жылыту маусымына 80% дайын», - деп хабарлайды үкімет.