Туризм индустриясы комитетінің басшысы карантин кезеңінде жасаған төлемі үшін шыдамдылық танытуға шақырды
Әлем елдеріндегі коронавирус пандемиясы әсерінен енгізілген карантиндік шектеулер қазақстандық туристік компаниялардың да жұмысын тоқтатып, шығынға батырды. Қаншама турист демалысын шет елдерде өткізуден бас тартуға мәжбүр болды. ҚР МСМ Туризм индустриясы комитетінің төрағасы Дастан Рыспеков туроператорлар дағдарысқа ұшырағандықтан, жолдама алып қойған тұрғындарды жағдай реттелгенше шыдай тұруға шақырды.
«Бір уақытта шығынды өтеу туралы өтініштер мен шағымдардың көбейіп кетуі туристік компаниялардың жұмысының тоқтап қалуына себеп болуы мүмкін. Кейбіреулері банкротқа ұшырайды. Бұл екі тарапқа да жақсы емес. Қазір екі жақты да қанағаттандыратын баламалы шешім табу маңызды болып тұр. Өзара түсіністік туристік кәсіпорындардың жабылып қалмауына, ал туристерге жағдай реттелген соң демалысқа шығуға мүмкіндік береді. Осыған байланысты халықтан жағдайға түсіністікпен қарап, нарық ретке келгенше туристік компаниялардан ақша талап етуді мүмкіндігінше кейінге қалдыруды өтінеміз», - деді Дастан Рыспеков.
Комитетет басшысының айтуынша, келісімшарт бойынша шетелдік кей қонақүйлер мен әуе компаниялары туроператорларға төленіп қойған ақшаны қайырып бермейді. Бұл – туроператор ахуалын одан әрі қиындатады.
«Турпакеттерді алу кезіндегі серіктестік қарым-қатынас жүйесінің өте күрделі болуы көшпелі туризм саласындағы жағдайды қиындата түсті. Тұтынушыларға шетелдік курорттарға жіберуге сатылған турпакеттер бағасына ұшақ билеті, қонақүй құны секілді халықаралық төлемдер қосылған. Егер тұтынушы демалыстан бас тартып, ақшасын қайтаруды сұраса, туроператорларға брондау үшін депозитке салған қаржысын қайтару мәселесін шешуіне тура келеді. Бұл шаруалар өте көп уақыт алады. Көп жағдайларда шетелдік серіктестер ақшаны қайтармайды. Сондықтан туркомпаниялар тұтынушыға демалыс уақытын немесе орнын ауыстыру туралы ұсыныс жасайды», - деп толықтырды төраға.
Абай Сейфулла, Нұр-Сұлтан