ШұғылШымкентте 75 жастағы әйел коронавирустан көз жұмды

«Бұл әскери режимге көшу емес». Министр жаппай әскерге шақыру себебін түсіндірді

Арнайы шақыртуды мобилизациялаумен шатастыруға болмайды

фото: «Айбалта-2019» оқу-жаттығу жиыны

Қорғаныс министрі Нұрлан Ермекбаев Президенттің міндеттілерді әскерге шақыру туралы қаулысын түсіндірді.

«Бұл Жарлықтың негізгі мазмұны – әкімдерге әскери міндеттілерді арнайы жиындарға шақыруға мүмкіндік пен құқық беру. Ал басты мақсаты – ең алдымен, халқымыздың қауіпсіздігі мен денсаулығын қорғау және қамтамасыз ету», - деді Н.Ермекбаев.

Арнайы шақыртуларды мобилизациялаумен шатастыруға болмайды.

«Мобилизация деген – барлық саланы, ұйымдарды, халықты әскери режимге көшіру. Қазір әңгіме бұл туралы болып жатқан жоқ. Әскери шақырулар жылына бірнеше рет өтіп тұрады. Әкімдердің оқу-жаттығу өткізуде тәжірибесі бар. Олар жергілікті әскери комиссариаттар арқылы адамдарды отбасылық жағдайына, денсаулығына, жасына, тағы басқа факторларға қарай шақырады», - деп түсіндірді министр.

Сондықтан қаулы әкімдерді жергілікті әскери бөлімдерді толық көлемде кеңейтуге міндеттемейді.

«Міндет атқару мерзіміне, шақырылушылардың санына қатысты арнайы тапсырма жоқ. Әскерге шақыру ары кеткенде, 3 айға созылуы мүмкін. Бірақ нақты уақытты жергілікті атқарушы органдардың өздері белгілейді. Олар қажеттілікке қарай жинап, жұмыстар біткен соң шақыруды тоқтата алады. Мысалы, кей әкімдер 10 күн ішінде аяқтауы мүмкін», - деді бұған қатысты ол.

Кей аймақтарда әскерге шақыру, тіпті, қажет болмауы да мүмкін екен. Себебі, әскери бөлімдер орналасқан аймақтарда жауынгерлер онсыз да шаруаға араласып, іс-шараларды толық көлемде атқарып жатыр. Бір бөлігі басқа аймақтарға жіберілген.

Еске салайық, кеше Мемлекет басшысы Қасым-Жомарт Тоқаев әскери міндеттілерді арнаулы жиындарға шақыру туралы Жарлыққа қол қойды.

Абай Сейфулла, Нұр-Сұлтан

Сұхбат